ഗ്രാമ പഞ്ചായത്തിന്റെ ചരിത്രം
ചരിത്രം
സാമൂഹ്യസാംസ്കാരികചരിത്രം
ചൊക്ലി പഞ്ചായത്ത് മേനപ്രം, ഒളവിലം പഞ്ചായത്തുകള് സംയോജിപ്പിച്ചാണ് രൂപീകരിച്ചത്. പണ്ടുകാലത്ത് നെടുമ്പ്രം പന്ന്യന്നൂര് ദേശത്തിന്റെയും മേനപ്രം പെരിങ്ങളം ദേശത്തിന്റെയും ഭാഗമായിരുന്നു.ഇന്നത്തെ രജിസ്ട്രാഫീസിനു സമീപം ഒരു ചെക്ക്പോസ്റ്റ് ഉണ്ടായിരുന്നതിനാല് “ചൗക്കി ഹള്ളി” (ചെക്ക് പോസ്റ്റ് ഉള്ളഗ്രാമം)എന്ന പേര് പിന്നീട് “ചൊക്ലി”യായി മാറിയതായി കരുതപ്പെടുന്നു. ഒളവിലം എന്ന പേര് “ഓളംവയല്” എന്ന പദത്തില് നിന്നാണ് ഉണ്ടായത്. ഊരാച്ചേരി ഗുരുനാഥന്മാര് ജീവിച്ചിരുന്ന പ്രദേശമായതിനാലാണ് കവിയൂര് എന്ന പേര് ഉണ്ടായത്. കെ. കണാരന് മാസ്റ്റര്, വി.സി. കുഞ്ഞിരാമന് വൈദ്യര് തുടങ്ങി നിരവധി സ്വാതന്ത്ര്യസമരസേനാനികള് ഇവിടെ പ്രവര്ത്തിച്ചിരുന്നു. വി.സി. കുഞ്ഞിരാമന് വൈദ്യര് വി.പി. ഓറിയന്റല് ഹൈസ്കൂള് സ്ഥാപിക്കുകയും വിദ്യാഭ്യാസ-സാഹിത്യ രംഗങ്ങളില് ശ്രദ്ധേയ സംഭാവനകള് നല്കുകയും ചെയ്തു. ചൊക്ലി പഴയകാലത്ത് പ്രധാന വ്യാപാരകേന്ദ്രമായിരുന്നു. പാലത്തായി, പാനൂര്, കല്ലിക്കണ്ടി തുടങ്ങിയ പ്രദേശങ്ങളില് നിന്നുള്ളവര് ഇവിടെ വ്യാപാരത്തിനായി എത്തിയിരുന്നു. ലോകത്തിലെ വലിയ ചൂരല് വ്യവസായകേന്ദ്രങ്ങളിലൊന്നായി ചൊക്ലി അറിയപ്പെട്ടിരുന്നു. കൈത്തറി, ബീഡി, ചകിരി, നെയ്ത്ത് തുടങ്ങിയ പരമ്പരാഗത തൊഴില്മേഖലകളാല് പ്രദേശം സമ്പന്നമാണ്. മലയാളം–ഇംഗ്ലീഷ് നിഘണ്ടു നിര്മാണത്തില് ഹെര്മന് ഗുണ്ടര്ട്ടിനെ സഹായിച്ച ഊരാച്ചേരി ഗുരുനാഥന്മാര് ഇവിടെ ജീവിച്ചിരുന്നു. ശ്രീനാരായണഗുരു സ്മാരക ഗ്രന്ഥാലയം സാമൂഹിക-സാംസ്കാരിക പ്രവര്ത്തനങ്ങളുടെ പ്രധാന കേന്ദ്രമായിരുന്നു. ഒളവിലം എല്.പി. സ്കൂള് (1870), ഗുരുകുലം എല്.പി. സ്കൂള് (1871), കാരാറത്ത് യു.പി. സ്കൂള് (1882) എന്നിവ പഞ്ചായത്തിലെ പഴയ വിദ്യാലയങ്ങളാണ്. കൂത്ത്, കൂടിയാട്ടം, കഥകളി, കോല്ക്കളി തുടങ്ങിയ കലാരൂപങ്ങള് ചൊക്ലിയുടെ സമ്പന്നമായ സാംസ്കാരിക പൈതൃകത്തിന്റെ ഭാഗമായിരുന്നു.